God se Woord VARS vir jou Vandag
God se Woord VARS vir jou Vandag
As Ek Maar Net Geluister Het
Jesaja 48:17-18 So sê die Here, jou Verlosser, die Heilige van Israel: Ek is die Here jou God wat jou onderrig tot jou beswil, wat jou lei op die pad waarop jy moet gaan. As jy maar aan my gebooie gehoorsaam was, sou daar voorspoed en redding vir jou gekom het, so onkeerbaar soos 'n rivier, soos die golwe van die see.
Sê my, as jy terugkyk oor jou lewe, hoeveel keer het ‘n opregte persoon jou al goeie raad gegee - raad wat jy deur jou eie hardkoppigheid geïgnoreer het… net om ‘n groot fout te begaan wat jou duur te staan gekom het? Ek dink as ek 'n Rand gehad het vir elke keer wat ek dit gedoen het, sou ek vandag ‘n redelik ryk man gewees het!
Ek was gefassineerd deur hierdie artikel op die foreignpolicy.com. webwerf deur ene Roberta Hostetter geskryf. Ek haal aan...
Met dagbreek op 7 Desember 1941, het die Japannese die Amerikaanse Stille Oseaan-vloot by Pearl Harbour, in Hawaii, aangeval en die eens onwillige, neutrale Amerika gedwing om in die Tweede Wêreldoorlog betrokke te raak. Ten spyte van die feit dat die Verenigde State reeds daarin geslaag het om Japannese geheime kodes in die aanloop tot die aanval, te ontsyfer, was die vlootbasis heeltemal onvoorbereid vir die aanval. Wat dit nog erger gemaak het, was die feit dat 'n militêre attaché in Java vir Washington 'n week vroeër al van 'n beplande Japannese aanval op Hawaii, die Filippyne, en Thailand waarsku het. Nog nooit tevore het die VSA soveel inligting voor die tyd oor die vyand se planne gehad nie.
Ons verstaan wat hier gebeur het, nè? Die Verenigde State het die geheime inligting geïgnoreer, die advies geïgnoreer, met baie rampspoedige gevolge. As hulle maar net geluister het...
Jesaja 48:17-18 So sê die Here, jou Verlosser, die Heilige van Israel: Ek is die Here jou God wat jou onderrig tot jou beswil, wat jou lei op die pad waarop jy moet gaan. As jy maar aan my gebooie gehoorsaam was, sou daar voorspoed en redding vir jou gekom het, so onkeerbaar soos 'n rivier, soos die golwe van die see.
Dis Sy Woord. Vars … vir jou … vandag.