Verdraagsaamheid teenoor Goedkeuring

Johannes 8:10,11 Toe het Hy regop gekom en vir haar gevra: “Mevrou, waar is hulle? Het nie een van hulle die oordeel oor jou voltrek nie?” “Niemand nie, Here,” sê sy. Toe sê Jesus: “Ek doen dit ook nie. Gaan maar en moet van nou af nie meer sonde doen nie.” 

As daar net een woord is om die oorheersende morele waardes van hierdie tyd te beskryf, sal dit ongetwyfeld die woord "verdraagsaamheid" wees. Ons weet instinktief dat sommige van die dinge waaroor ons veronderstel is om ‘verdraagsaam’ te wees, baie beslis verkeerd is. Dit wil lyk asof die idee ‘verdraagsaamheid,’ ordentlikheid, besorgdheid en liefde kom vervang het.

Waarom kan verdraagsaamheid in hierdie ‘alles is oukei’- wêreld waarin ons leef, nie eerder ordentlikheid en respek beteken nie? Ja, ons weet almal die sedes is vandag nie wat hulle was toe ek grootgeword het nie ... maar dit is lank gelede. Die wêreld het verander. Ons het aanbeweeg na beter dinge, nuwe uitvindsels – alles het slimmer, minder verkramp, meer aanvaarbaar geword. Is dit 'n goeie ding?

Wag ‘n bietjie. Kyk na sommige van die dinge wat ons gevra, selfs verplig word om te onderskryf. Losbandigheid in alle vorme, alternatiewe leefstyle en ekonomiese strukture wat die gaping tussen ryk en arm vergroot.

Die Amerikaanse Katolieke Aartsbiskop Charles J. Chaput, stel dit so: Boosheid verkondig verdraagsaamheid totdat dit alles oorheers, en daarna probeer dit die goeie stilmaak. Ek stem nogal daarmee saam.

In Jesus se tyd is 'n vrou in owerspel betrap. Die godsdienstige leiers wou haar volgens die Joodse gebruik stenig, maar Jesus het vir haar in die bres getree en haar verdedig.

Johannes 8:10,11 Toe het Hy regop gekom en vir haar gevra: “Mevrou, waar is hulle? Het nie een van hulle die oordeel oor jou voltrek nie?” “Niemand nie, Here,” sê sy. Toe sê Jesus: “Ek doen dit ook nie. Gaan maar en moet van nou af nie meer sonde doen nie.”

Dit blyk dat verdraagsaamheid en goedkeuring twee heeltemal verskillende dinge is. Ja ons is natuurlik beveel om almal lief te hê, dis reg, maar Jesus wys ons dat dit nie beteken dat ons hulle sonde moet goedpraat nie.

Dit is God se Woord. Vars … vir jou … vandag.