Deur God Geskud

Handelinge 4:31 Nadat hulle gebid het, het die plek waar hulle bymekaar was, geskud. Hulle is almal met die Heilige Gees vervul en het met vrymoedigheid die woord van God verkondig. 

Ons voltooi vandag die mini-reeks oor vervolging. Ek het hierdie paar boodskappe beplan, nie omdat ek een of ander morbiede begeerte het om op lyding te fokus nie, maar omdat die vervolging van mense wat glo dat Jesus die Seun van God is, dat Hy vir hulle sondes gesterf het en weer opgestaan het, besig is toe te neem.

Nouja, miskien dink jy dat hierdie idee van ‘n toenemende gety van vervolging jou nie raak nie. Die lewe is goed, die wêreld gaan aan; hoekom praat Berni dan hieroor?

In 2023 het Geopende Deure ('n bediening aan vervolgde Christene) berig dat meer as 360 miljoen Christene weens hul geloof, hoë vlakke van vervolging en diskriminasie - insluitend geweld, tronkstraf, verlies van eiendom en sosiale uitsluiting - ervaar.

In daardie selfde jaar is die aantal Christene wat vir hul geloof vermoor is, op meer as 5 000 geskat - 'n effense afname van vorige jare; maar dit wys ons dat geweld teen Christene steeds ‘n werklikheid is.

Gister het ons gesien hoe sommige eerste-eeuse Christene, onder leiding van Petrus en Johannes, gereageer het op die vervolging wat hulle ly. Hulle het gebid vir vrymoedigheid om voort te gaan om mense van Jesus te vertel, en vir God gevra om hulle ook wonders te laat doen om mense van sy krag te oortuig.

 So … wat het op die ou end gebeur? Hoe het God gereageer?

Handelinge 4:31 Nadat hulle gebid het, het die plek waar hulle bymekaar was, geskud. Hulle is almal met die Heilige Gees vervul en het met vrymoedigheid die woord van God verkondig.

God het hulle gebed verhoor. Hy het die aarde geskud. Hy het hulle met sy Heilige Gees vervul. Hy het hulle presies gegee waarvoor hulle gevra het – die vrymoedigheid om die Woord van God in die openbaar te verkondig.

Daar is net een soort gebed waarvan die Bybel ons leer – die soort wat kragtige resultate het. So wanneer jy dalk vervolging in die gesig staar … bid vir vrymoedigheid en weet dat ons getroue God hoor!

Dis Sy Woord. Vars … vir jou … vandag.